— فالمغرب الى بغيتي ولادك يقراو خاصك تجبد الفلوس. دخلهوم لمدرسة البعثة الفرنسية ولا هاد المدرسة البريطانية الي السنة الدراسية فيها طلع عليك بالقليلة ب 15مليون و مزال تسناهم يقبلوهم ليك. اوا المواطن العادي راه كيمشي على قد جيبو و على قد الكريدي الي خدا و كيسجل ولادو فدوك المدارس الخاصة الي كثرو ولاو كثر من التيليبوتيكات فعام2000. ولي مدابز غير مع الوقت راه ولادو غيقراو مع 40واحد ولا كثر فالقسم، شي قرا شي مقرا يزيدها على شي كلا شي ماكلا.. جا السيد الوزير حصاد ،كلو طموح و عزم، قاليك راه سياسة التعريب الي ناهجها المغرب هادي تلاثين عام هي مولات هاد الفضيحة و هاد الفشل الي ولينا معروفين به و قرر انه غيتقراو المواد العلمية بالفرونسي. واخا، حاجة مزيانة و بديهية و كانت تقدر تطبق هاد الفكرة من شحال هادي. و لكن هذا القرار راه ماشي الحل المعجزة الي غادي يحيي لنا قطاع التعليم الي مات و صلينا فجنازته. غادي نزيدو هاد القرار على الي سبقو .. ميثاق التعليم الوطني (1999-2005) و Programme d'urgence pour l'éducation (2009-2012) ؛ الرؤية الاستراتيجية للإصلاح (2015-2030) . الشعب و ولادو راه تكْهمو بكثرة التقارير والتقييمات الي كتبدا مع كل وزير و حكومة. ولا هاد التصريحات من قبيل ان هاذ القرار غادي يمكنا من "ظهور مدرسة المساواة وتكافؤ الفرص، مدرسة للتميز و الانفتاح والتقدم الاجتماعي" قسم فيه 46 تلميذ ، اشمن تميز و اشمن انفتاح غادي تلقى فيه؟ اش غادي يقري هاد الأستاذ و اش غادي يستافد هاد الدري؟ علاش النيفو ديال المعلمين و الاساتذة غادي و كينقص؟واش معندناش مشكل فتدريب المعلمين وطرق التدريس؟ واش بقات فتسبق يوم الدخول المدرسي بحجة يبداو بكري المقرر يالله يقدهوم الوقت؟ راه داك المقرر براسو هو سباب هاد المشاكل! واش بقات فتحية العَلم كل صباح و الزي المدرسي و الطبلية للاستاذ؟ ايه هادشي راه مزيان ولكن راه بحال المزوق من برا اش خبارك من الداخل! راه ولينا شوهة ملي كتشوف مؤشرات البنك الدولي إلى كتبين أن نوعية التعليم في المغرب أقل من متوسط الدول الفقيرة في أفريقيا جنوب الصحراء الكبرى، 79 ٪ من التلاميذ الي عمرهم 10 سنين معندهومش حتى ليباز ديال القراءة. واحد التقرير اخر ديال الجمعية الدولية لتقييم التحصيل التعليمي: قالو انه التعليم ديال الماط فقسم الرابع ابتدائي مكلاسي فيه المغرب 48 من بين 52 دولة تم تقييمها. اليونسكو فواحد التقرير ديال 2014 قال ان المغرب من بين الدول الي مزال بعيييد من ناحية الاهداف الي تقررات فالمؤتمر العالمي ديال"التعليم للجميع"1990. في اخِر تقرير ديال البنك الدولي في ماي الفايت، مورا عامين ديال البحوث و التحليلات، كيقول انه خاص تتحقق في المغرب "معجزة تعليمية" ، و اصلاح شامل لنظامي التعليم و الصحة و بلا بهم راه غير كنخويو الماء في الرملة.
