واش مالين موازين تصطاو. كاليك البطاقة الوطنية ديال كل واحد يشري تذكرة

صعيب على الرئيس الجديد لمغرب الثقافات عبد السلام احيزون يغير فوقت قصير عقلية متعجرفة مولفة تخلع عباد الله. هاد المؤسسة اللي كتنظم "موازين" كانت كلشي كيديرو وحاسة باللي الاخر ما غاديش يزيد فالهدرة. خايف ولا مخلوع على مصالحو ولا جبان. المهم كينفد وبسرعة.
اصحاب هاد العقلية كلهم مازال. اللي تغير هو الرئيس. البنية ديال الرئيس السابق مازال كاينة ورجالاتو حتى هما كلهم كاينين اللي ما كيحتارمو الا سيدهم وولي نعمتهم الماجيدي. حقاش رجع منهم بنادم وكاين اللي ولى مرفح وكان على الضص وكاين اللي ولى مشهور وخدام بشي حاجة ماشي ديالو. المهم شي رعاوين ولاو شخصيات.
ودابا هاد العقلية فرضات على اللي بغى يشري تذكرة فشي حفل فموازين يعطي رقم بطاقة التعريف الوطنية. واش ولى لموازين بوليس ديالهم؟ باي قانون ياخدو ارقام البطاقات الوطنية للمواطنين؟ المضحك انه فالفلوس ما كيقبلو غير الاداء بالبطاقة ولا الاسبيس. وشفتو علي مهرجان كيف داير وعلاش ايلى ما بقاش فالبلاد ما غادي يتغير والو