اغلب الدول العظمى كاين وسطها أو فجنابها ملاذات ضريبية ، وللي هي عبارة عن دويلات صغيرة عندها استقلال نوعي نظرا لشروط تاريخية بحال فحالة سان مارينو لي جات وسط الطاليان أو أندورا لي جات فوق البيريني بين sبانيا وفرانسا وعدة دول أخرى على هاد الشكل بحال ليكسlبورغ وليزينشتاين وعدة جزر منتشرة هنا وهناك تابعة للدول العظمى أو مستقلة ولكن تحت سيطرتها بحال باناما نيت ، وهادشي معروف وجاري بيه العمل وماشي شي حاجة جديدة لي غادا تبهر أو تدير ضجة كبيرة خصوصا فدول العالم السفلي. أي واحد عادي من العامة تسولوا على المسؤولين غادي يقوليك راه غي الشفارة ومكاين غير جمع وخبي فسويسرا، هادشي متعارف عليه وداخل فالثقافة الشعبية ، كما أن هاد المواطن البسيط نيت كيعتابر أنه الإفلات من الضريبة هو نوع من الذكاء وواجب كاع فالغالب، وأي حاجة عندها علاقة بفلوس كتمشي للدولة بالنسبة ليه مضيعة، حيث كتمشي غي للشفارة ، شحال من واحد مآمن أنه يعطي رشوة لشرطي فالطريق هو أمر جد أخلاقي، بالنسبة ليه الدراوش كيتعاونوا بيناتهم، ويفضل يعطي ثمن المخالفة للبوليسي يديرو فجيبو على أنه يمشي للدولة
وغي مثلا فالبيع وشرا ديال الأراضي والديور ، من بين المتفق عليه عند العديد من المغاربة ، أنه جد عادي أنك الى بعتي دار مثلا مكتقيدش ثمنها كلو فالوراق بل غي واحد المبلغ باش تجي الضريبة ناقصة والباقي كتشدو تحت الطابلة ، وكون كانت الضريبة على السيارات بلا مراقبة وعقوبات زجرية حقيقية تلقى كثر من النص ممخلصهاش هذا هو المواطن المغربي على مستوى القاعدة ، طبعا كنستثني بعض مغاربة المواقع الإجتماعية المستسهلين في التغريد على أيتها حاجة ، ولي تفاعلوا مع هاد الأمر أنه جريمة وفضيحة وكاين كاع لي كيتسنى احتجاجات شعبية تطالب بمحاسبة المفسدين، بينما هو كيفضل يشري ماروخا ديال الشمال والمورطاديلة والنوتيلة ان استطاع اليها سبيلا ، عوض المنتوجات المغربية ، وفجيبو باكية دلكارو كوطربوند وقاليك حتى هو باغي يحارب الفساد .
وطبعا ملي كتكون القاعدة بحال هاكة فراه أعلى الهرم كيكون انعكاس ليها ولكن على مستوى أكبر ، وهادشي لي وقع مع وثائق بنما ، لي كنظن أنها ماجابتش شي حاجة جديدة مكناش عارفينها وحتى الشخوص لي تذكروا فيها ( أنا قريت غي بوتين وبشار الأسد )، كانوا من قبل معروفين بهادشي ومن غير هادشي راه تقريبا العالم أجمع غادي بهاد الوثيرة لا على مستوى الشركات الكبرى أو الأفراد ، حيث هاد الملاذات الضريبية كون بغاوهم بصح موالين الوقت ديال بصح مايكونوش راه ماغاديش يكونوا ، حيث أغلبهم فإمارات أو دول معندها حتى 5 دلعساكرية ، ولكن تلك حكمة النظام العالمي وهوما لي عارفين آش كاين .
