القصر يستمر في تسويق الملك واخا ما محتاجش. صورة جديدة لمحمد السادس رفقة لالة سلمى وها اش طرا حسب الصفحة غير الرسمية للملك

مرة اخرى يتم استعمال صفحة الملك محمد السادس على الفايسبوك لتسويق صورة انسانية لمحمد السادس عبر المسمى سفيان البحري. طبعا هاد السيد ما كيدير والو كيكولو ليه نشر نشر والدليل ان الصورة كيف موخودة كتبين ان المصور محترف وانه سمح له بالتقاطها. راه حدا الملك والاميرة
ماشي مشكل الملك ظريف والناس كيبغيوه بلا سفيان البحري ولا مصطفى العلوي ولا "لوماتان". مول هاد الصفحة باش يعطي لراسو مصداقية قال ان شخصا دعى يونس اتصل به واخبره انه مساء الاحد بكورنيش البيضاء على الساعة السابعة اضطر الملك لايقاف سيارته بعد ازدحام شديد في الطريق الساحلية". وان الشعب هو اللي فتح الطريق للملك.
طبعا هاد الشي ما يحتاجش لخبر لان المغاربة عزيز عليهم الملك وبزاف وثانيا يستحيل الملك يكون يتجول والامن ما فراسوش باللي حدا حديقة سندبان فعين الذياب.
دابا غير شوية المصداقية راه ماشي البحري اللي كيدير هاد الشي راه غير واجهة. بزاف عليه يكون بهاد الحرفية ويكونو مواطني المغرب عندهم تلفونو. الملك عزيز على لمغاربة نعاودوها للمرة الثالثة ومحتاج لشخص اذكى من المسمى البحري واخا فالواجهة.