لاعبين الزمالك كاعيين قبل الفينال ضد بركان ومدربهم كيحاول يكالميهم

كيعيشو الزمالك المصري حالة من الحزن قبل من مواجهة نهضة بركان فلالي ديال فينال كاس الكونفدرالية الأفريقي الاحد الجاي فالتيران البلدي فبركان.
وكشفت جريدة الوطن المصرية، وانه واخا الزمالك دخلو ضد سموحة البارح فالبطولة المصرية بالدوزيام إيكيب، ولكن راه كانو باغيين يربحو، وان فيستيير الفريق كيعيش حالة من الحزن بعد الماتش اللي خسروه بنتيجة واحد لزيرو، وان اللاعبين كاعيين، لدرجة ان مدرب الزمالك جوزي گوميز جمعهم وطلب منهم ينساو الخسارة والماتش مع سموحة ويفكرو فالفينال مع نهضة بركان ويركزو عليه.
نفس المصدر، وضح أن مدرب الزمالك قال للاعبين ديالو ان هاد الخسارة ماشي نهاية العالم وانه هو المسؤول عليها حيث فضل ما يلعبش عدد كبير من اللاعبين الأساسيين خوفا عليهم من الاصابات باش يخدل الفينال ضد نهضة بركان بأكبر عدد من اللاعبين الأساسيين، وقالهم يسدو ماتش سموحة ويفكرو دابا فالفينال ديال الكونفدرالية باش يهديو الكاس للجمهور ديال الزمالك، ووضحت الجريدة المصرية، أن الحزن كان باين على عدد من لاعبين الزمالك، وأبرزهم محمد عواد، وأحمد فتوح، وسيف الدين الجزيري اللي كانو كاعيين.