كابيتان نهضة بركان: بغينا الروح الرياضية تكون فماتش اتحاد العاصمة.. والفريق المزيان هو اللي غايربح

اكد يوسوفو دايو لاعب نهضة بركان أن الماتش ضد اتحاد العاصمة الجزائري ضمن اياب دومي فينال كاس الكونفدرالية الإفريقية ما غيكونش ساهل، ولكن هما موجدين له باش يربحو ويتأهلو، واكد على ان الماتش هو منافسة فالكورة ومباراة مع الأصدقاء الجزائريين والروح الرياضية هي اللي خاصها تكون والفريق المزيان هو اللي يربح.
وهضر يوسوفو دايو كابيتان نهضة بركان فالندوة الصحافية اللي كتسبق الماتش ضد اتحاد العاصمة الجزائري، وقال: "الماتش ضد اتحاد العاصمة غيكون صعيب، وحنا عارفين المسؤولية اللي علينا، وواجدين غدا باش نديرو ماتش مزيان ونتأهلو للفينال، كاين علينا الضغط ولكن حنا مولفين نتعاملو معه".
وكمل دايو: "غنلعبو مع صحابنا الجزائريين بروح رياضية ونديرو ماتش يكون فيه سبيكطاكل باش المشجعين يتمتعو وهادي هي الكورة، والفريق الأفضل هو اللي غيربح وطبعا الأفضل هو نهضة بركان".