فيلدا: كنا نربحو الزامبيات بكثر من 2 وهاد الرباح غادي يخلينا نوجدو لماتش الروتور فالمغرب مزيان

اعتبر الإسباني خورخي فيلدا أن النتيجة اللي حقق المنتخب الوطني المغربي النسوي اليوم الجمعة فزامبيا فماتش الالي ديال الدور الرابع المؤهل إلى أولمبياد باريس 2024، بالرباح 2 لواحد نتيجة ايجابية، واكد انهم واخا ما لعبوش بالطريقة ديالهم ولكن كانو يربحو زامبيا بكثر من هاد النتيجة بالنظر للفرص اللي جات للبؤات.
وهضر خورخي فيلدا مدرب المنتخب المغربي النسوي فتصريح للموقع الرسمي للجامعة الملكية المغربية لكرة القدم، ملي سالا ماتش المغرب وزامبيا وقال: "نافسنا بقوة فهاد الماتش وخلقنا بزاف من فرص التسجيل، وبقى فينا الحال حيث ما ماركيناش بزاف".
وكمل الناخب الوطني: "بالطريقة اللي لعبنا بها كنا نماركيو كثر، ولعبنا بزاف فالنص ديال تيرانا وما موالفاش لنا، ولكن فالشوط الثاني عرفنا كيفاش نتعاملو مع هذا الشي، وهما جاوهم الكوفرات بزاف وهذا الشي ما كناش باغيينو، وماركاو علينا، ولكن كتبقى هاد النتيجة مقبولة باش نلعبو ماتش الروتور فالمغرب ونوجدو له باحسن ما عندنا".