شكون للي غادي يتحرك ويحمي سكان أحياء فسطات من الكلاب الضالة ؟

وللات ظاهرة انتشار الكلاب الضالة بمدينة سطات، خصوصا فأحياء مجمع الخير والربيع، كتشكل خطر على الساكنة والمارة بالأخص العيالات للي كيخرجو لمارشي والدراري لي كيمشيو المدرسة، هاد الشي واقع والجهات المعنية ما عندها خبار.
ومع تنامي هاذ الظاهرة وللات كتزاد مشاكل السّاكنة لي ما بقاش كتعرف طعم الراحة، من جهة خايفة بنهار على السلامة ديالها وديال وليداتها الجسدية، الواحد غادي ويتلفت وراه خايف من شي عضة، ومن جهة تانية، محرومة من الراحة والنعاس مللي كيوصل الليل، حيت كتبدا الكلاب في النبيح، يبدا واحد يتبعو لاخر.
أحد السكان من مجمع الخير أكد ل"گود" أن الظاهرة كثرات والكلاب ضالة تزادت بزاف، حينت عدد كبير منها كيجي من مناطق اخرى، وحذر نفس المصدر من وقوع إصابات في صفوف الأطفال الصغار والتلاميذ للي غاديين لمدارسهم، حينت يمكن هاد الكلاب تعضهم، وتكرفس عليهم، وللي ممكن يكون بعضها مصابا بداء الكلب أو "السًعر".
وقد طالبت مجموعة من الأصوات الجهات المسؤولة بالمدينة، بالتحرك واتخاذ التدابير اللازمة للتخلص من هاد الكلاب الضالة التي أصبحت ترهق بالهم وكتقلق راحتهم.