طلبة ديال ENCG فسطات ساخطين على رئيس الجامعة: خلصنا 50 ألف درهم ومبغاش يعطينا ديبلوماتنا وغادين نمشيو للقضاء

سخط كبير كاين وسط طلبة التكوين المستمر لي قراو مؤخرا، فالمدرسة الوطنية للتجارة والتسيير بسطات، بعدما رفض رئيس جامعة الحسن الأول يوقع ليهم على الديبلومات ديالهم.
ووفق شكايات توصلات بها "گود" فراه عدد كبير ديال الطلبة طالع ليهم الدم، حينت قراو عامين وسوتناو، وقبل من هاد الشي كامل خلصو 50 ألف درهم مقسمة على عامين، اللي هو ثمن الماستر فالتكوين المستمر، ومتعطاوهمش الديبلومات.
وقال عدد من المتضررين ل"گود" انهم غادين يمشيو للقضاء يديرو دعوى ضد رئيس الجامعة للي مبلوكي كولشي ومابغيش يعطيهم الدبلومات.
هاد الطلبة كيمشيو للإدارة ديال المدرسة الوطنية للتجارة والتسيير بسطات اللي كانو كيقراو فيها ماكتعطيهمش جواب مقنع، وخلاتهم غادين جايين قبل ميفكرو دابا يمشيو للقضاء ويكبروها باش تصغار.