لاراديك ديال سطات كتهين ساكنة الإقليم وخلقات أزمة ديال العطش وهاعلاش

ساكنة مدينة سطات قرات البارح في مختلف قنوات التواصل إعلان ديال لارديك كتقول فيه أن تزويد مدينة سطات بالما غادي يبدا اليوم الخميس من الساعة الثامنة صباحاً إلى غاية الواحدة زوالا فقط، نظرا للنقص للي كيعرفو إقليم سطات على مستوى الموارد المائية.
وكاع هاد الشي لاراديك محسباتهاش مزيان، حينت مني كتطلق الماء كيخرج في الأول صدا دونك راه كتضيع كمية كبيرة تقريبا جوج سطولة من كل دار، باش يوصل الواحد الما صافي ونقي.
مصدر ديال "كود، قال بللي هاد الوكالة مالتزماتش بعد الإعلان، بحيت أن هذا المدة الزمنية لدارت للناس طلعات ليهم الدم وخلاتهم كاعيين او هازين بوديزاتهم ويقلبو على الما، وهاد الشي لي كيبين أنه غيكون احتقان فالمدينة بسباب غياب التواصل ما بين الجهات المكلفة في تدبير هاد المادة الحيوية وما بين الساكنة ، لو كان التواصل غتعرف لاراديك الوقت للي الساكنة تقدر تستغنى فيه على الما وفوقاش تقدر تحبسو على الناس.
مصدر آخر قال إن مسؤول الوكالة المستقلة لتوزيع الماء والكهرباء راه موزع ماشي مورد والضحية هو المواطن أي هنا عارفين أن كاين مشكل في ضل الظرفية الحالية المتسمة بانخفاض حاد في هذه المادة الحيوية، نتيجة قلة التساقطات المطرية وتوالي سنوات الجفاف ولكن راه خاص يكون تواصل حقيقي مع الساكنة واش الساكنة معندهاش اعتبار عند المسؤولين؟.