تداريب خاصة لعدلي مع سايس وزياش فالمنتخب المغربي

خدام الدولي المغربي أمين عدلي فبروگرام خاص، بعدما وصل على المنتخب الوطني المغربي للكوت ديفوار، للمشاركة فكوب دافريك.
وداير الناخب الوطني المغربي وليد الركراكي والطاقم التقني ديالو بروگرام خاص لأمين عدلي باش يرجعو له لافريشور فيزيك، قبل ما يدخل يتدرب مع الگروب، وهذا الشي حيث يالاه وصل اللاعب هادي يومين على المنتخب بعدما تعطل بسبب وفاة الام ديالو.
وكيدير أمين عدلي تمارين خاصة مع الثنائي رومان سايس وحكيم زياش اللي راجعين من الاصابة، عاد غيقدرو يتدربو مع صحابهم مع ليكيب ناسيونال، فالوقت اللي مازال عند نصير مزراوي بروگرام خاص به بعدما سالا العلاج ديالو فمركز محمد السادس.