ها جديد الاسود فالكوت ديفوار: الركراكي داير لهم تداريب قاصحة وماتش أميكال ضد سيراليون

كيواصل المنتخب الوطني المغربي لكرة القدم الاستعدادات لكوب دافريك فالكوت ديفوار، وهي المسابقة اللي غتكون ما بين 13 يناير و11 فبراير 2024.
ودار المنتخب الوطني المغربي اليوم الاربعاء حصة تدريبة هي الثالثة له فمدينة سان بيدرو الايفوارية، وكانت تحت اشراف الناخب الوطني وليد الركراكي، وفيها كانت تداريب شاقة للاعبين وفالحرارة باش يولفو على الطقس والرطوبة ويقدرو بدنيا يستحملو الاحوال الجوية الحارة.
الحصة التدريبية كان فيها ايضا التركيز على الجانب التقني والتكتيكي مع اللاعبين، وغدا الخميس غيلعبو ماتش أميكال ضد منتخب سيراليون، وهو آخر محطة اعدادية للركراكي والأسود قبل كوب دافريك اللي غيبداها بمواجهة منتخب تنزانيا يوم الاربعاء 17 يناير.
وعرفت عشية اليوم الاربعاء، وصول كل من امين عدلي ونصير مزراوي على بعثة المنتخب الوطني المغربي فالكوت ديفوار، باش يبداو يوجدو معهم لاكوب دافريك، بعدما تعطلو حيث عدلي وتوفات له ماماه وخرج من المعسكر التدريبي فمركز محمد السادس فالمعمورة، ومزراوي بقى حتى سالا العلاج ديالو فالمركز.