الأسود أول منتخب غيوصل للكوت ديفوار

غيكون المنتخب الوطني المغربي هو أول المنتخبات اللي غتوصل للكوت ديفوار، بعدما شد لها الطيارة هاد الصباح من المغرب باش يشارك فكوب دافريك، اللي غتكون ما بين 13 يناير و11 فبراير 2024.
وحسب الاتحاد الإفريقي لكرة القدم، فالمنتخب الوطني المغربي مول الإنجاز التاريخي فمونديال 2022، هو أول منتخب غيوصل للكوت ديفوار من المنتخبات المشاركة فكوب دافريك، حيث غيوصل لها اليوم الاحد هو منتخب غينيا بيساو، وباقي المنتخبات غيبداو يوصلو ابتداء من غدا الاثنين.
وكيلعبو أسود الأطلس، اللي وصلو إلى ربع النهائي ديال النسخة الماضية بالكاميرون، فالكروب 6 مع الكونغو الديمقراطية وزامبيا والمنتخب التنزاني.