البنزرتي: الماتش ضد سيمبا صعيب وغندخلو نربحوهم.. كنعرف الوداد مزيان وما عنديش مشكل فهادشي

أكد التونسي فوزي البنزرتي مدرب الوداد الرياضي أن الماتش ضد سيمبا التنزاني غدا الثلاثاء، غيكون صعيب وأن الفريق التنزاني قوي، ولكن الواك غيديرو جهدهم كامل باش يربحو، وقال بلي كيعرف الوداد مزيان وما عندوش مشكل فالتعرف على اللاعبين.
وتحدث فوزي البنزرتي، خلال الندوة الصحافية اللي كتسبق ماتش الوداد وسيمبا ضمن الجولة 4 من دور مجموعات دوري أبطال اإفريقيا، وقال: "غنلعبو ضد فريق قوي والماتش غيكون صعيب، وكل واحد غيبغي يعطي اللي عندو باش يربح النقاط وغنديرو كاع جهدنا باش نربحو".
وبخصوص الرجوع ديالو لتدريب الوداد قال البنزرتي أن هذه المرة هي الرابعة اللي كيدرب فيها الفريق الأحمر والواك ما غريبش عليه، ووضح: "كنعرف لكروب مزيان فالوداد راه يالاه كنت مدرب للفريق عامين هادي، داكشي علاش كنعرف أغلب اللاعبين ومزيان، باستثناء شي عناصر، وما عنديش مشكل فهادشي".