فيه بصمة مغربية باينة: المغرب كيكشف لأول مرة لوݣو كأس العالم 2030

قال موقع "El confidencial" إن المغرب تفوق مرة اخرى على الصبليون وهو اللي كشف على لوݣو كأس العالم 2030 لأول مرة.
ووضح أنه ماشي أول مرة يتفوق المغرب على اسبانيا حيث فايت ربحها فكأس العالم فقطر ،والملك محمد السادس هو اللي كان علن الترشح الثلاثي ديال كأس العالم 2030 ودبا هو اللي كشف لوݣو ديال كأس العالم.
وأضاف أن الجامعة الملكية المغربية لكرة القدم هي الأولى اللي قررات تخبي الشعار وتسجلو عند المكتب المغربي للملكية الفكرية كخطوة أولى قبل القيام بذلك عالميًا.
ووصف الموقع الإسباني اللوݣو أنه عبارة على كرة ونصف كرة فيهم دايرة بخطوط حمراء وخضراء وصفراء، وهي الألوان المشتركة لأعلام الدول الثلاث اللي مرشحة، وتحت منها شعار"yalla Vamos" الكلمة الأولى كتعني بالدرجة " يالاه" والكلمة الثانية كتستعمل فاللغة الإسبانية والبرتغالية.
وفالسطر الأخير كاينين أسماء الدول الأعضاء الثلاثة باللغة الإنجليزية، حسب الترتيب الأبجدي ل الدول المرشحة: المغرب، البرتغال، إسبانيا.
وعلق الموقع أن وخا اللوݣو خصو يرمز للتحالف الثلاثي لكرة القدم إلا أنه فيه بصمة مغربية كبيرة أولا بالكلمة Yalla أمام فاموس. ثانيا، كان بإمكانهم يحطو أسماء الدول الثلاثة حسب الترتيب الأبجدي ديال لغاتهم الرسمية، كما هو الحال فالاتحاد الأوروبي، وفهاد الحالة غتكون اسبانيا هي الأولى فالترتيب.
https://www.elconfidencial.com/deportes/futbol/mundial/2023-12-17/marruecos-espana-mundial-simbolo-mundial-logo_3794246/?utm_source=whatsapp&utm_medium=social&utm_campaign=appEC&fbclid=IwAR0BRSRuUuPBCd6wTYPOHuPzJKkXNb4M3igG3Oxsehx22uhaTvQKgXXEt4Q