اللي قتل ولد عمو فالحسيمة وشدوه بوليس هولندا: خايف من الإعدام وما غادي نهضر إلا إذا ضمنت راسي مغاديش نتسلم للمغرب

قالت مواقع إخبارية هولندية، أن المتهم اللي قتل ولد عمو ف الحسيمة نهاية يوليوز الفايت وشدوه بوليس هولندا قال للدفاع ديالو أنه خايف من الإعدام ف المملكة وما غادي يتكلم على ظروف ارتكاب الجريمة، إلا ف حالة وحدة، واللي هي ضمان عدم تسليمه إلى المغرب.
وخلال الجلسة الأولى للمحكمة ف روتردام، تبين أن المعني بالأمر رفض يهضر منذ تسليم نفسه. ويبلغ من العمر 25 عام وقتل ولد عمو ب جنوية بسباب خلاف بيناتهم على اللعاقة وسبق ليه تشد بسباب تهريب المخدرات وكان مطلوب أمنيا.
وبعد ارتكابه الجريمة هرب إلى إسبانيا عبر مليلية، قبل اعتقاله ف هولندا. وبعد أيام قليلة من عثور البوليس ف الحسيمة على جثة شاب مغربي مقيم ف هولندا واللي تلقى طعنة قاتلة على مستوى القلب ديالو، عرفات مدينة روتردام حوادث تفجير انتقامية مرتبطة ب الجريمة اللي وقعات ف الحسيمة.