إيلا وقعات ليكم شي حاجة فماسنجر ماتفاجؤوش.. فيسبوك غادي يدير واحد التغيير فهاد الشهر

علنات شركة ميتا الميريكانية أنها غادي توقف ديك الخاصية ديال التواصل بين فايسبوك ماسنجر وإنستغرام انطلااقا من النص فهاد الشهر.
كانت الشركة ديال التكنولوجيا العملاقة دارت هاد اللعيبة من هادي 3 سنين، وكتخلي الناس تشاطي وتبارطاجي الميساجات ديالها من فيسبوك ماسنجر لإنستغرام.
قسم الدعم الرسمي في الشركة قال أنه ابتداءا من النص ف الشهر الجاي ماغاديش يولوي الناس يقدرو يسيفطو الميساجات ديالهم من بين دوك جوج مواقع، وغادي يكتافيو ف الوقت الحالي غير يقراوهوم وصافي.
المشكل فهادشي كامل، هو أن الشركة براسها ماقلتش لينا على السباب لي خلاها تدير هاد اللعيبة، ولكن شي تقارير كيربطوه بشي قوانين دارها الاتحاد الأوروبي على هادشي د السوشل ميديا.
دابا كيقولو أن فيسبوك يقدر يربط الميساجات ديالو بواتساب، إيوا حنا ماعلينا غير نتسناو.