العصبة الاحترافية كتقلب على حل لمؤجلات الوداد المتراكمة قبل الديربي ضد الرجاء

كتحاول العصبة الوطنية لكرة القدم الاحترافية تلقى حل مشكل مؤجلات الوداد الرياضي، قبل ما تبرمج موعد ديربي الدار البيضاء بين الفريق الأحمر والرجاء الرياضي عن الدورة 14 من البطولة.
وكشفت مصادر مطلعة، أن العصبة الوطنية لكرة القدم الاحترافية باغيا تسالي ماتشات الذهاب مع نهاية شهر دجنبر المقبل أي قبل من التجمع الإعدادي ديال المنتخب الوطني المغربي استعدادا لكأس إفريقيا اللي بسبابها غتوقف البطولة الاحترافية.
وأنه خدامين باش يلقاو حل لبرمجة الدورات المتبقية، ولكن بشكل مقاد وفيه تكافؤ الفرص بين جميع الفرق، وأن العصبة الاحترافية باغيين الوداد يلعب الماتشات ديالو كاملين المؤجلين، قبل وصول موعد ماتش الديربي أمام الرجاء الرياضي فالدورة 14، واللي باغيين يبرمجوه فالسيمانة الأخيرة من شهر دجنبر المقبل.
خالقة الماتشات المؤجلة ديال الوداد الرياضي بسبب الالتزام ديالو بالمشاركة فالسوبر ليك الإفريقي، واللي وصلت إلى 3 مباريات، (خالقة) عائق ديال البرمجة بالنسبة للعصبة الوطنية لكرة القدم الاحترافية، اللي حاولت مع النادي باش يلعبهم خلال التوقف الدولي اللي سالا، ولكن إدارة الواك رفضت حيث عندها 3 لاعبين فالمنتخب الوطني المغربي وهذا حق كيمنحو لها القانون.