الوداد شدو الطيارة لجنوب إفريقيا وعادل رمزي: عازمين نهديو السوبر ليك لسيدنا ونفرحو كاع المغاربة

شدو الوداد الرياضي الطريق إلى جنوب إفريقيا باش يلعبو إياب فينال السوبر ليك الإفريقي ضد ماميلودي صن داونز الجنوب إفريقي الويكاند الجاي.
وبعدما دارو الوداد الرياضي آخر حصة تدريبة فتيران بنحلون، مشاو فالكار للفندق وسط كازا تعشاو ومن تماك رجعو خداو الكار وهاد المرة داهم إلى مطار محمد الخامس بالدار البيضاء، وخداو الطيارة الخاصة إلى جوهانسبرك الجنوب إفريقية فمنتصف ليلة الأربعاء- الخميس.
بعثة الوداد الرياضي على رأسها عضو المكتب المديري للنادي عبد المجيد البرناكي، ومشى معها فريق من الأمن الخاص وطاقم ديال الكوزينة.
وبخصوص الماتش ديال الوداد الرياضي ضد صن داونز فبريطوريا، ضمن إياب فينال السوبر ليك، قال عادل رمزي مدرب الفريق الأحمر فتصريح له: "غنمشيو لجنوب إفريقيا عازمين باش نفرحو جمهورنا وبلادنا ونهديو هذا الكأس لسيدنا وللمغاربة كاملين".