غيبداو الرجاء الرياضي يوجدو للماتش ديالهم ضد فريق شباب السوالم للي غيتلعب الويكاند الجاي فمدينة المحمدية ضمن الدورة 9 من منافسات البطولة الاحترافية، فالوقت اللي غيغيب فيه المدافع الشاب بوشعيب عراسي على الفريق هاد الأيام بسبب الإصابة. الرجاء الرياضي ومن بعدما استافدو البارح الثلاثاء من يوم ديال الراحة، عطاها لهم المدرب الأماني جوزيف زينباور بعد ماتش الاثنين ضد الفتح الرياضي اللي ربحوها بنتيجة 2 لزيرو ضمن الدورة 8 من البطولة، غيرجعو اليوم الاربعاء لأجواء التداريب، وعندهم حصة تدريبية غيخدمو فيها على إزالة العياء ويرجعو لافريشور فيزيك. وغيبداو الرجاء من اليوم الأربعاء كيوجدو لماتش السوالم اللي غيتلعب السبت الجاي، ومن جهة اخرى، قرر الطاقم الطبي للفريق الأخضر يعطي سيمانة راحة للمدافع بوشعيب عراسي باش يرتاح بسبب الإصابة اللي لحقت به فماتش الفتح، وهذا الشي غيخلي المدرب جوزيف زينباور مطالب أنه يلقى حلول على مستوى دفاع الخضرا فالماتش الجاي ضد السوالم، اللي مطالبين فيه النسور بالرباح.
