الرجاء كيوجدو للميركاتو وعينيهم على البطولة ما تفلتش

بداو الرجاء الرياضي كيقلبو على سد الخصاص اللي كاين فالفريق، على بعد شهرين تقريبا من الميركاتو الشتوي الجاي، باش يبقاو منافسين على لقب البطولة الاحترافية، خصوصا وأنه الفريق كينافس غير محليا هذا الموسم.
وحسب مصادر "كود" فالرجاء الرياضي عاطين الضو الأخضر للمدرب جوزيف زينباور باش يحدد شنو خاصو وبدا عملية الاختبار لشي لاعبين خصوصا على مستوى الهجوم، وكاين واحد المهاجم نيجيري كيتيستيو فيه دابا وغيكونو لاعبين آخرين خلال الأسابيع المقبلة باش يشوفوهم واش قادرين يهزو توني الفريق قبل ما يمشيو للميركاتو.
ومن المنتظر يديرو الرجاء الرياضي انتداب او جوج على الأقل فالهجوم والدفاع ديال الفريق، باش يدعمو صفوفهم استعدادا لمرحلة الإياب من البطولة، واللي باغيين يربحو لقبها، وهدا الشي كيجي بعد المشاكل اللي عند الخضرا فالهجوم حيث الفريق كيخلق بزاف من فرص التسجيل ولكن ما كاينش اللي ماركيها.