بلاتفورم التذاكر ماشي د الوداد وها مولاها وها علاش كاين تضارب المصالح

مباشرة من بعد إعلان الوداد على البلاتفورم "الجديدة" للتذاكر، لاحظ الزوار ان هاد البلاتفور هي نفسها اللي كانت خدامة بيها كازا ايڤنت، نفس البرنامج نفس الديزاين وكلشي، غير تم وضع لوغو الوداد وتغيير بعض المعطيات... حتى انهم خلاو الخانة اللي متعلقة بخانة الترويج للحفلات!
بحسب المعطيات اللي توصل بيها كود، بالامر كتعلق ببلاتفورم تابعة لشركة خاصة في الملكية ديال موظف سابق في كازا ايڤنت (بحسب السي ڤي ديالو) هاد الشخص توفيق الراضي بنجلون كان مسؤول التسويق والتواصل في عهد رئيس الوداد أكرم، من بعد غادي يخدم في شركة سونارجيس ديال تدبير الملاعب قبلما يلتاحق بشركة كازا إڤنت واللي خرج منها (دائما بحسب السي ڤي ديالو) هادي اربعة اشهر اي مباشرة من بعدما تحيد ملعب محمد الخامس لهاد الشركة.
موقع الوداد ديال التذاكر اذن ماشي ديال الوداد ولكن ديال شركة توفيق الراضي بنجلون عن طريق شركة ديالو اللي اسس شهر غشت 2022 بلاي مناجمنت گروب تحت رقم 553413.
السؤال هنا ماشي على الوداد ولكن على هاد الشركة : واش السيستام ديال كازا ايڤنت وخداتو هاد الشركة اللي كان مولاها موظف فكازا إڤنت ؟ ولا السيستام ديال هاد الشركة وخدمات بيه كازا ايڤنت ؟ واللي كيفما كان الجواب غادي تكون نتيجة وحدة وهي تضارب المصالح !