الركراكي: فرحان بجمهور أكادير وبرد فعل اللاعبين فماتش ليبيريا بعد مباراة الكوت ديفوار

شكر الناخب الوطني وليد الركراكي الجماهير المغربية فمدينة أكادير على دعمها للمنتخب المغربي أمام ليبيريا، ومساهمتها فالرباح اللي حقق فالدورة الأخيرة من إقصائيات كوب دافريك، وشكر اللاعبين على المستوى اللي قدمو.
وتحدث وليد الركراكي فتصريح بعد رباح المغرب على ليبيريا بنتيجة 3 لزيرو، وقال: "كنشكر جمهور أكادير اللي جاو عمرو التيران وشجعو اللاعبين وعاونونا بزاف وفرحنا بهم".
ووضح الركراكي: "الرباح ديال اليوم على ليبيريا رد فعل مزيان بعد الماتش ضد الكوت ديفوار، دوماج ضيعنا بزاف الفرص قبل ما نماركيو الهدف الأول، ولكن ملي ضربنا الهدف الماتش مشى كيف بغينا".
وكمل الركراكي: "طحنا فواحد الفريق اللي واقف ولكن فالأخير الرباح ديالنا معقول وأنا فرحان بلارياكسيون ديال اللاعبين اليوم حيث كانت مزيانة".