المغرب التطواني فاقو من الگلبة وربحو الحسنية فأگادير والسوسيين باديين الموسم بشكل كارثي

خسرو حسنية اكادير الماتش ديالهم مع المغرب التطواني اليوم السبت فتيران ادرار فأكادير، برسم الدورة 3 من البطولة الاحترافية لكرة القدم.
الماتش بين حسنية أكادير والمغرب التطواني هو اول لقاء فالدورة 3، وقبل ما يبدا عرف وقوف الفريقين دقيقة صمت حدادا وتضامنا مع ضحايا زلزال الحوز.
وسالا الماتش بين الحسنية والمغرب التطواني بنتيجة 2 لزيرو للتطوانيين امام صدمة السوسيين، وماركا للمغرب التطواني اللاعب باب بادجي الهدفين بجوج فالدقيقة 37 و فالدقيقة 69.
وفاقو المغرب التطواني بهذا الرباح وخرجو من النتائج السلبية، بعدما خسرو وتعادلو فالدورة الاولى والثانية، ورفعو بهذا الانتصار رصيدهم إلى 4 نقاط وطلعو مؤقتا إلى المركز الرابع.
اما حسنية أكادير فبقاو مستمرين فالبداية الكارثية ديالهم هذا الموسم، وخسرو ثاني ماتش من أصل ثلاثة لعبوهم مقابل تعادل وحيد، والفريق عندو نقطة وحيدة حتى لدابا خذاها من أصل 9 النقاط كانت ممكنة.