الرجاوي الزنيتي باغي يلبي أي طلب لطفل من ضحايا زلزال الحوز والرجاء أكثر الفرق مساهمة فالتخفيف من الفاجعة

كيواصل الرجاء الرياضي والمكونات ديالو الانخراط فحملة التضامن الواسعة مع ضحايا زلزال الحوز، اللي تسبب فمرت كثر من 2900 شخص، واصابة كثر من 6000 شخص.
وهذه المرة جات نوبة الكابيتان ديال الرجاء الرياضي، أنس الزنيتي اللي دار مبادرة زوينة تجاه واحد الطفل رجاوي من دوار برحيل فتارودانت، واللي بان فواحد الفيديو لابس توني الرجاء وملي سولوه على شكون كيعجبو فالخضرا قاليهم أنس الزنيتي.
مصادر مطلعة، كشفت أن أنس الزنيتي وبعدما شاف فيديو الطفل الرجاوي قلب على كيفاش يوصل له، وبالفعل تواصل معه وعبر له على التضامن ديالو معه فالفاجعة اللي صابتو هو وجميع الاهل ديالو وأكد له أنه مستعد يلبي له أي طلب وأي حاجة محتاج لها.
للاشارة، فالرجاء الرياضي برئاسة محمد بودريقة من بين الاندية المغربية الاكثر نشاطا فتقديم المساعدات لضحايا زلزال الحوز، حيث بادر للتكفل بالطفل ياسين، وكذلك دار قافلة فيها المساعدات من خلال رجا فونداسيون للمتضررين من الفاجعة، وقرر المساهمة بالفلوس فصندوق التخفيف من اثار الزلزال، واللاعبين ديالو ساهمو حتى هما بالفلوس وبالدم والاكثر من هذا بداو كيتواصل مع شي أطفال من خلال تطبيقات التواصل الاجتماعي باش يخففو عليهم شويا ويواسيوهم.