المغرب ربح بوركينافاسو فماتش طغى عليه الحداد والتضامن مع ضحايا الحوز.. الركراكي عطى الفرصة لبزاف د اللاعبين والأسود ضيعو فرص كثيرة

ربح المنتخب الوطني المغربي فالماتش أميكال اللي لعب اليوم الثلاثاء ففرنسا، مع منتخب بوركينافاسو، وهو الماتش اللي تلعب فأجواء ديال الحداد على ضحايا زلزال الحوز.
وسالا الماتش بين المنتخب الوطني المغربي وبوركينافاسو بنتيجة واحد لزيرو لمصلحة الأسود، وكانت المواجهة فرصة للناخب الوطني وليد الركراكي باش يشوف شحال من لاعب والمستوى ديالو وشنو الإضافة اللي يقدر يعطي.
وتسنى المنتخب الوطني المغربي حتى الدقيقة 36 باش يماركي الهدف ديال الرباح بواسطة عز الدين أوناحي، اللي قد يبني هجمة ولعب الكرة بشكل سريع مع أشرف حكيمي وبعدها مع أمين العدلي اللي عطاه أسيست واخترق اوناحي دفاع البوركينابيين وضربها للشبكة ماركها.
وملي سجل عز الدين أوناحي الهدف للمنتخب المغربي، ما ما بغاش يحتفل هو وصحابو حيث بحالهم بحال جميع المغاربة فحالة حداد، وتجمعو كاملين وتعانقو فميساج على أن المغاربة كلهم يدر وحدة.
وبقات النتيجة بين المنتخب الوطني المغربي وبوركينافاسو واحد لزيرو حتى سالا الماتش، واخا لاعبين المغرب جاتهم فرص كثيرة سوا بالضغط اللي داروه على البوركينابيين او من خلال ليكونتر أتاك، ولكن قلة التركيز والتسرع خلاهم يضيعو بزاف ديال الاهداف ويسالي الماتش غير بواحد لزيرو.