برافو..ضربة للحيثان الكبار اللي شبعو فلوس السكن الاقتصادي: اجتماع حكومي خاص بتنزيل الدعم والوزيرة بغات تخرجو قبل مايسالي العام

اليوم كان اجتماع مهم بخصوص الدعم المباشر للسكن بالنسبة للفئات الهشة، ترأسو رئيس الحكومة عزيز اخنوش بحضور القطاعات المعنية.
وشارك في هذا الاجتماع، كل من عبد الوافي لفتيت وزير الداخلية، ونادية فتاح وزيرة الاقتصاد والمالية، وفاطمة الزهراء المنصوري وزيرة إعداد التراب الوطني والتعمير والإسكان وسياسة المدينة، وفوزي لقجع الوزير المنتدب لدى وزيرة الاقتصاد والمالية المكلف بالميزانية.
وحسب مصادر "كود" فإن الاجتماع شكل مرحلة مهمة باش يتم تفعيل واخراج المراسيم المتعلقة بهاد الدعم قبل نهاية السنة.
وأكدت مصادر "كود" بلي المنصوري بغات تخرج الدعم قبل نهاية العام، رغم أن لوبي العقار وكبار المنعشين العقاريين لي ضربو اللعاقة بزاف من فلوس السكن الاقتصادي والامتيازات للي فيه، كيعارضو هاد الدعم.
بهاد الخطوة غايسالي المغرب مع مرحلة استفادة كبار المنعشين العقارين من امتيازات مقابل سكن اقتصادي عيان فالجودة وكولشي ولكن بالنسبة ليهم هوتة.
فهاد الدعم كاينين مسامير الميدة ضدو خصوصا لوبي المنعشين العقاريين الكبار، دبا كولشي غايتبدل وحتى الشركات العقارية الصغيرة غايكون عند الحق تبني ولا تبيع سكن للمواطن للي غايتسفد من الدعم المباشر من الدولة. فلوس كانت كاتمشي للباطرونات دبا غاتولي تمشي عند المواطن نيشان.