الضريبة جايا على كولشي: القطاع غير المهيكل (النوار) واليوتوبرز والمؤثرين ف2024.. ومصدر ل"كود": السجل الاجتماعي غادي يساعد نعرفو شحال عندهم وشحال خص يخلصو

اصلاح القطاع غير المهيكل ورش كبير تعطل، الحكومة معارفش منين تبداه، ولقات الامكانية البارزة هي المجهود لي دارت فكوفيد بحيث وصلت للأسر المعوزة بنسبة نجاح فايتا 90 في المائة، طبعا راميد لعب فيها دور، ولكن خصها مرحلة أخرى تعرف شكون لي كيدخل وكيدخر بزاف من القطاع غير المهيكل.
فحسب مصدر من لجنة المالية بمجلس النواب، فإن الإمكانية الأكثر دقة لتحديد أرباح ومداخيل القطاع غير المهيكل، هو السجل الاجتماعي، هاد المنظومة ديال "البق ما يزهق" كولشي غايعرفوه حيث كاين سيستيم دقيق الكتروني مرتبط بادارات كثيرة منها المحافظة العقارية منها شركات التدبير المفوض ديال الماء والضوء والابناك، غايعرفو شحال كتخسر واش داكشي كيتناسب مع التصريحات ديالك.
وقال ذات المصدر ل"كود"، كتلقا شخص كيدير فالعمل بدون، وكيراكم الثراوت غير بالتلفون من المقهى، معندو لا محل ولا باطونط ولا والو ولا يخلص الضريبة ولكن ديما محرك فلوس وشاري عقارات وو.. مضيفا :"كاينين فالقطاع غير المهيكل دايرين فيلات وسيارات من نوع رفيع ولكن مكيعطيو والو الدولة لي موفرة ليها الامن والامان والادارات وكولشي".
تضريب القطاع غير المهيكل، كان نقاش في الحكومة السابقة، مقدروش يقربو ليها بحيث مكانتش امكانيات يوصلو ويحددو هاد الفئة. ولكن دبا حكومة اخنوش وضعات يدها على هاد الفئة وقررت تدمج القطاع غير المهيكل فالنظام الضريبي.
هاد الادماج الضريبي علنات عليه نادية فتاح العلوي، وزيرة الاقتصاد وتالمالية فمناقشة المشروع بلجنة المايلة فمجلس المستشارين.
وحسب مصدر برلماني فإن هاد الإدماج الضريبي غايكون ف2024، وكيتزامن مع توجاد الحكومة لقانون خاص بفرض ضرائب على المؤثرين واليوتوبرز ولللي كيحققو ارباح من السوشل ميديا.
اغلبية المغاربة كيخدمو ف نوار اي القطاع غير الهيكل، فايتين 60 فالمائة من الساكنة النشيطة.