باريس سان جيرمان تسناو مبابي حتى لعب باش يماركي لهم وبوخلال صيد حكيمي وحرم عليهم الرباح

تسناو باريس سان جيرمان الفرنسي بكل نجومهم، حتى لعب العملاق الفرنساوي كيليان مبابي باش يماركي لهم او هدف فهاد الموسم الرياضي الجديد، ولكن النجم المغربي زكرياء بوخلال لاعب تولوز حرم عليهم الرباح بهدف ديال الشمتة.
ولعبو باريس سان جيرمان الفرنسي فريق النجم المغربي أشرف حكيمي اللي دار ماتش زوين قبل ما يتصيد فاخر اللحظات، (لعبو) ضد تولوز فريق النجم المغربي الاخر زكرياء بوخلال، وتعادلو واحد لواحد، اليوم السبت برسم الدورة الثانية من البطولة الفرنسية
باريس سان جيرمان الفرنسي حاول فالشوط الاول يماركي من خلال مجموعة ديال الفرص واللي ساهم فيها أشرف حكيمي، ولكن مهاجمين الفريق ما قدروش يماركيوهم.
وتسناو PSG الشوط الثاني، وبالضبط دخول كيليان مبابي، باش يماركي لهم الهدف الاول فالماتش وهو اول هدف حتى فهاد الموسم، وسجلو من بيلانتي.
وفالوقت اللي كاشي كان كيتسنا ان باريس سان جرمان غيخرجو رابحين، خرج زكرياء بوخلال فواحد الهجمة وصيد أشرف حكيمي فواحد الكرة وطيحو، والحكم د الماتش ما عطلوش وصفر بيلانتي لتولوز، ومنو ماركا بوخلال التعادل.