باريس سان جيرمان رجعو مبابي يتدرب مع الفريق

رجع النجم الفرنسي كيليان مبابي لتداريب باريس سان جيرمان الفرنسي بعدما بعدوه خلال الأسابيع الماضية، لأنه رفض يجدد العقد ديالو معهم حيث باغي يمشي لريال مدريد الإسباني.
وكشفت جريدة "ليكيب" الفرنسية، أن باريس سان جرمان رجع كيليان مبابي وأنتكراه فالكروب خلال الحصة التدريبية ديال صباح اليوم الاحد، واللي كتجي بعد الماتش الأول فالبطولة الفرنسية اللي لعبو الفريق البارح السبت مع فريق لوريان وخلات باريس سان جيرمان يباد حملة الدفاع عن اللقب بتعادل سلبي.
نفس المصدر، قال بلي كيليان مبابي غيشارك فالحصة التدريبية تحت إشراف المدرب الإسباني لويس انريكي، وغيجي رئيس باريس سان جيرمان الفرنسي ناصر الخليفي للتداريب باش يدوي كيليان مبابي.
ومازال كلشي كيتسنا باش غيسالي مسلسل كيليان مبابي وباريس سان جيرمان الفرنسي، اللي طوال بزاف خصوصا بعدما تم استبعاد اللاعب من الفريق الأول والمعسكر التدريبي هذا الصيف، وحطوه مع اللاعبين غير المرغوب فيهم، حيث ما بغاش يجدد العقد ديالو مع الفريق اللي غيسالي صيف 2024، ورافض الانتقال إلى فريق آخر هذا الصيف من غير ريال مدريد الإسباني.