زاد اكد القطري ناصر الخليفي مول باريس الفرنسي، بلي ما غيخليش نجم الكرة العالمية الفرنسي كيليان مبابي، يمشي فابور لريال مدريد الإسباني. وخلال التقديم ديالو للاسباني لويس إنريكي للمدرب الجديد لباريس سان جيرمان، قال ناصر الخليفي بلي كيليان مبابي كان قال براسو على أنه ما غيمشي فابرو من باريس سان جيرمان. وكمل مول باريس سان جيرمان وقال: "اذا مبابي بدل رأيو فهذا الشي غلط ديالو ماشي ديالي، وراه مستحيل يمشي أحسن لاعب فالعالم فابرو". وكيضغطو باريس سان جيرمان على النجم كيليان مبابي باش يجدد العقد ديالو مع باريس سان جيرمان لفوق صيف 2024، باش يزيدو فثمن صفقة بيع العقد ديالو لريال مدريد الإسباني. وعارفين باريس سان جيرمان أن كيليان مبابي باغي يمشي بأسرع وقت إلى ريال مدريد وما كرهش فهذا الصيف، ولكن هم طامعين باش يزيدو فالعقد ديالهم معه اللي غيسالي صيف 2024، وفنفس الوقت خايفين يكمل معهم الموسم الجاي ويولي حر وبالتالي يمشي فابور.
