الركراكي: حكيمي كيعرف مبابي مزيان وحنا ما ديرينش له خطة

أكد الناخب الوطني وليد الركراكي أن أشرف حكيمي غادي يكون قادر توقيف صاحبو فباريس سان جيرمان كيليان مبابي نجم المنتخب الفرنسي غدا فنصف نهائي كأس العالم قطر 2022، ما بين المغرب وفرنسا ونفى بلي غادي تكون شي خطة مخصصة لمبابي بالضبط.
وليد الركراكي توجه له سؤال خلال الندوة الصحافية اللي كتسبق ماتش المغرب وفرنسا على علاقة أشرف حكيمي بصاحبو الفرنسي كيليان مبابي وتاثيرها فالمواحهة بينهم وقال: "أشرف حكيمي كيعرف كيليان مبابي كثر مني، وكيتدرب معه يوميا فباريس سان جيرمان وعندو فكرة واضحة عليه".
وكمل الركراكي وقال: "ما غاديش نديرو خطة على قبل مبابي حيث ما كاينش غير هو، راه كاين كريزمان وديمبيلي وخاصنا نلعبو بشكل جماعي، أشرف حكيمي واحد من أحسن اللاعبين فالعالم كظهير ايمن وغادي يكون صراع ما بينو وبين مبابي وما غاديش يعطيه ليكادو وماشي غير له هو وإنما للمنتخب الفرنسي كامل".