مانشستر سيتي توج لاول مرة بالسوبر الاوروبي بعدما ربح بالبيلانتيات إشبيلية فريق النصيري وبونو اللي دارو فينال كبير

توج فريق مانشستير سيتي الانجليزي بلقب كاس السوبر الاوروبي، بعدما ربح اليوم الاربعاء فالفينال باليونان إشبيلية الاسباني فريق المغربيين يوسف النصيري وياسين بونو، واللي دارو ماتش كبير ولكن ما كانوش محظوظين.
وسالا الماتش بين اشبيلية الاسباني ومانشستر سيتي الانجليزي بنتيجة التعادل هدف واحد لكل فريق، وقدر يوسف النصيري يعطي التقدم فالماتش لاشبيلية وضرب هدف واعر على مانشستر سيتي فالدقيقة 26، بعدما تهز فوق المدافعين وضرب الكرة بالراس للشبكة وخلا المدافيعين كيتفرجو لا حول ولا قوة لهم.
وخلال الشوط الثاني، يوسف النصيري يقدر يزيد يماركي جوج بيوتا ولكن ما كانش عندو فيهم الزهر وضيعهم، وبالمقابل جابو مانشستر سيتي التعادل بهدف ماركاه كولر بالمير فالدقية 63، ما كيتحملش فيه الكول المغربي ياسين بونو المسؤولية حيث الغلط دارو دفاع إشبيلية اللي خلا 3 المهاجمين بلا تغطية، مع العلم ان ياسين بونو عطى لاشبيلية الثقة فالدقائق الاولى من الماتش، بعدما تصدى لجوج كرات خطيرة على الاقل ديال مانشستر سيتي، ما يجبدهمش أي كول، وعتق الفريق الاسباني فالشوط الثاني من بزاف ديال الكرات.
ومشاو الفريقين بعد نهاية الوقت الاصلي من الماتش بالتعادل واحد لواحد، (مشاو) لعبو ضربات الترجيح، واللي حسمها فريق مانشستر سيتي بنتيجة 5 مقبال 4 لإشبيلية، وهكذا كيتوج الفريق الانجليزي بلقب السوبر الاوروبي لاول مرة فالتاريخ ديالو، أما إشبيلية فكيخسرو الفينال السادس لهم فالسوبر الاوروبي من أصل 7.