الاسم حمد الله والتخصص السعودية.. ولد آسفي ماركا وساهم فرباح الاتحاد على الرائد وبنزيما صام

كيواصل الدولي المغربي عبد الرزاق حمد الله التألق فالبطولة السعودية، وأكد أنه لا يمكن التفريط فيه من طرف اتحاد جدة السعودي واخا جابو النجوم من أوروبا وأولهم النجم الفرنسي كريم بنزيما.
وعطى حضور عبد الرزاق حمد الله فالتشكيلة الرسمية ديال اتحاد جدة حيوية كبيرة لهجوم الفريق مع كريم بنزيما فالماتش اليوم الاثنين، أمام الرائد ضمن الجولة الأول من البطولة السعودية، واخا زكلو بزاف ديال الأهداف فالشوط الأول.
وتسناو اتحاد جدة حتى للشوط الثاني من الماتش عاد قدرو يماركيو، وطبعا مول الهدف هو عبد الرزاق حمد الله اللي جاتو كرة من كريم بنزينا ودريبلا دفاع الرائد وضرب الكرة للشبكة، وبعدها زاد لاعب وسط التيران ايكور كورونادو الهدف الثاني والثالث لاتحاد جدة، فالماتش اللي سالا بنتجية 3 لزيرو، وما كملوش حمد الله اللي خرجو المدرب برونو سانطو يرتاح وبالمقابل بقى كريم بنزيما لاعب حتى سالا الماتش.
وبهذا المستوى والرباح جاوب عبد الرزاق حمد الله مرة أخرى المنتقدين ديالو من مكونات اتحاد جدة، وأكد لهم أنه لاعب ما يقدروش يفرطو فيه حاليا، واخا عندهم نجوم عالميين بحال الفرنسي كريم بنزيما والمواطن ديالو نكولو كانتي والبرازيلي فابينيو اللي باين أنهم مازال ما ولفوش الطنطينة ديال السعودية.