بنزيما ما ساوي والو بلا حمد الله.. غاب ولد آسفي على اتحاد جدة ضد الهلال وهما يتقصاو من كأس العرب

غاب الدولي المغربي عبد الرزاق حمد الله على الفريق ديالو اتحاد جدة، فربع نهائي كاس العرب أمام الهلال فكلاسيكو السعودية، اليوم السبت بمدينة الطائف، وهو يخسر فريق بنزيما وصحابو وتقصاو من البطولة.
وسالا الماتش بين اتحاد جدة والهلال بنتيجة 3 لواحد لمصلحة الأخير اللي تأهل إلى الدومي فينال، وعرف اللقاء تضييع النجم الفرنسي كريم بنزيما بيلانتي بعدما ضرب الكرة فالبوطو، وكان باين عليه أنه ما لاعبش مرتاح فالماتش حيث ما لقاش مع من يلعب ويدور الكرة، بسبب غياب النجم المغربي عبد الرزاق حمد الله اللي توعت فالتداريب.
وكانو عبد الرزاق حمد الله وكريم بنزيما مشكلين ثنائي خطير خلال مباريات الدور الأول من كأس العرب، وبجوجهم كانو كيماركيو ومقدمين مستوى واعر، وغياب اللاعب المغربي اليوم على اتحاد جدة أمام الهلال أثر على النجم الفرنسي، اللي بان بحال الراس المقطوع هو والمواطن ديالو نكولو كانطي، وهذا الشي كان من الاسباب الرئيسية لإقصاء الفريق من المسابقة.
ماتش اليوم بين اتحاد جدة والهلال السعودي، كيزيد يؤكد أن الاتحاد محتاج للنجم المغربي عبد الرزاق حمد الله، اللي كان هداف الموسم الماضي فالبطولة السعودية وقاد الفريق للتتويج باللقب، ونفس الشي كان دارو من قبل مع النصر السعودي، وكيأكد أن اللي كانوا من جماهير اتحاد جدة كيطالبو حمد الله يمشي بحالو من الفريق كانوا غالطين.