حمد الله مبلبلها فالسعودية.. مدرب الاتحاد فركع الرمانة بعد الإقصاء أمام الهلال وغياب ولد اسفي على الماتش ماشي بسبب الإصابة

نايضة فالسعودية بسبب مشكل الدولي المغربي عبد الرزاق حمد الله والفريق ديالو اتحاد جدة، وتفضحت القضية بعد غياب اللاعب عن الفريق ضد الهلال فربع نهائي كأس العرب والخسارة والاقصاء، وتبين أن الغياب ديالو مع عندو علاقة لا بإصابة لا مشكل صحي.
وبعد نهاية ماتش اتحاد جدة والهلال بنتيجة 3 لواحد لمصلحة الأخير، وإقصاء الأول بالنجوم ديالو كريم بنزيما ونكولو كانطي، فركع مدرب الفريق نونو سانتو الرمانة خلال الندوة الصحافية اللي من بعد الماتش ملي سولوه الصحافيين على سبب غياب عبد الرزاق حمد الله.
مدرب اتحاد جدة ما عجبوش السؤال على حمد الله، وتقلق بزاف من خلال الجواب ديالو تأكد لكلشي أن غياب النجم المغربي على مواجهة الهلال ماشي حيث موعت كيفما تم الترويج له قبل المباراة، وقال أن المشكل مع عبد الرزاق حمد الله هو مشكل داخلي فاتحاد جدة، ومكونات النادي هي اللي بوحدها عندها الحق تناقشو، وقال كذلك وبحال إلا كيمعني على حمد الله بأن اللي باغي يبقى مع الفريق خاصو يطبق التعليمات ويحترمها واللي ما عجبوش الحال وبغا يمشي يمشي.
للإشارة فعلاقة عبد الرزاق حمد الله ومكونات اتحاد جدة السعودي من جماهير ومسؤولين بالنادي، متوترة ملي سنا الفريق مع النجم الفرنسي كريم بنزيما، وبزاف من الاتحاديين كيشوفو أن مجيء بنزيما كيمهد لرحيل حمد الله وخاصو يمشي بحالو، ولكن المدرب د اتحاد جدة ما بغاش هاد الخيار ورفض التخلي على عبد الرزاق حمد لله وتمسك به.