غايدير وليمة فالفيلا ديالو بميرلفت باش يلمو الشتات.. الوزير بايتاس عرض على المنتخبين والبرلمانيين والأعيان بجهتي سوس وكلميم ومصدر ل"كود": منتخبين وفاعلين رفضو

علمت "كود" من مصدر مطلع أن مصطفى بايتاس، الناطق الرسمي باسم الحكومة، عرض على عدد من البرلمانيين بجهتي سوس وكلميم وادنون والفاعلين والأعيان، لوليمة غايديرها هاد الأيام بالفيلا ديالو بسيدي إيفني وبالضبط فميرلفت.
بايتاس للي كيدوز كونجي فسيدي إيفني وميرلفت، حسب مصدر "كود" اتصل بعدد من النواب فهاد الجهتين باش يحضرو لوليمة ويناقشو أمور التنمية بالمنطقة، غير هو عدد من النواب والمنتخبين مبغاوش وممسوقينش لهاد الدعوة، بالنسبة لهم بايتاس ماشي من رموز المنطقة أو من الأعيان ديالها.
وأكد مصدر "كود" أن هاد الوليمة غاتكون مناسبة كذلك لتذويب بعض الخلافات بين الأحرار والبام من جهة وبين بعض المنتخبين الذين فضلوا معارضة التحالف الثلاثي (الأحرار، البام والاستقلال).
أحد الفاعلين بجهة سوس أكد في اتصال مع "كود" بلي فعلا بايتاس طلب منو يحضر ولكن :"مغاديش نحضر.. وعمرنا نساو الأخطاء لي دار وكيفاش دبر الانتخابات ومغاديش نمشي لا أنا ولا صحابي".