البارصا فرشو الفريق الفرنساوي : باريس سان جيرمان دايرين بنا السبة باش يضغطو على ريال مدريد فصفقة مبابي

نفاو البارصا الإسباني الرغبة ديالهم فالتعاقد مع النجم الفرنسي كيليان مبابي لاعب باريس سان جيرمان الفرنسي، وهو الخبر اللي كانت نشراتو جريدة "ليكيب" الفرنسية البارح، وفضح PSG وأكد أن الأخير كيروج هاد الشي باش يضغط على ريال مدريد.
وكشف مصدر من البارصا لجريدة "سبورت" الكتالونية، اللي قريبة من الفريق الإسباني، أن كيليان مبابي ما داخلش فالاستراتيجية ديال بارصالون، وأنه ما كاين حتى اهتمام بهذه الصفقة من طرف المسؤولين البارصاويين، وما عندهم حتى اجتماع مع باريس سان جيرمان الفرنسي على اللاعب.
وكمل وقال أن ترويج خبر دخول البارصا على صفقة كيليان مبابي ومن جريدة قريبة من باريس سان جيرمان الفرنسي، كيعني أن PSG كيضغطو على ريال مدريد، باش يتحركو ويبيعو لهم عقد اللاعب خلال هذا الميركاتو.