عبرت الجالية المغربية المقيمة بأستراليا على الفرحة حيث المنتخب المغربي للسيدات متواجد فهاد البلاد باش يشارك فكأس العالم 2023، وأكدت بلي غيشجعو اللاعبات المغربيات من التيران. وتحدثت الجماهير المغربية بملبورن بأستراليا عبر الموقع الرسمي ديال الجامعة الملكية المغربية لكرة القدم، وعبرت على السعادة ديالها حيث عندها فرصة باش تتفرج فالمنتخب المغربي، وتشم فيه ريحة لبلاد. وأكدت الجماهير المغربية بأستراليا من مختلف الأعمار عيالات وبنات أنهن موجدين باش يشجعني المنتخب المغربي شراو تذاكر الماتشات، وغيمشيو يتفرجو من أجل ماتش د ليكيب ناسيونال اللي غيكون ضد منتخب ألمانيا فستاد المستطيل بملبورن، وعندهم أمل أن غزلان الشباك وضحياتها يديرو شي إنجاز كيفما دار وليد الركراكي و وليداتو فمونديال قطر 2022. الجماهير المغربية بأستراليا متحفزة بزاف، وبحالها بحال جميع الجالية المغربية المقيمة بكاع أنحاء العالم، ما كتشوفو فالمنتخب المغربي أنه جاي يلعب ماتش د الكرة أو مشارك فمونديال وصافي، راه من خلال التصريحات ديالهم كيبينو أنهم محافظين على تمغرابيت ديالهم وخا ضاربين سنوات فالغربة، وكيفاش كيبغيو المغرب كيحبو سيدنا بزاف، وكيتسناو أي فرصة بحال هذه باش يشمو ريحة المغرب. وغيلعب المنتخب الوطني المغربي للسيدات غدا الاثنين أول ماتش فالتاريخ ديالو فكأس العالم، حيث مونديال استراليا ونيوزيلندا هي أول مشاركة له، والمباراة غتكون ضد ألمانيا وغتبدا مع 9 ونصف د الصباح بالتوقيت المغربي.
