كيبان ان مسلسل "شد ليا نقطع لك" بين الفرنسيين باريس سان جيرمان واللاعب ديالو كيليان مبابي، ما غيساليش دغيا وحتى الفراق ما غيكونش بشكل زوين، وهذا الشي بعدما حيدو المسؤولين د النادي الفرنسي اللاعب من لاليست الفريق المسافرة إلى اليابان لخوض معسكر تدريبي استعدادا للعام الجاي، فإشارة إلى أنهم قرروا يبيعو العقد ديالو لأي فريق هذا الصيف، وهذا الشي ضد الرغبة ديالو حيث هو باغي ريال مدريد الإسباني، والأخير ما باغيش يدخل فصقات غالية حاليا. وكشفت جريدة "ليكيب" الفرنسية، أن ما كايناش شي فرصة باش قدر يمشي أحسن لاعب فالعالم حاليا، كيليان مبابي من باريس سان جيرمان الفرنسي خلال هذا الصيف، من غير أنه يمشي لريال مدريد الإسباني، وأكدت الجريدة أن مبابي يقدر يمشي من باريس سان جيرمان هذا الصيف، إذا بدل الرأي ديلو ولكن هذا الشي صعيب بزاف حيث هو باغي ريال مدريد، والمشكل أنه باريس سان جيرمان مستعدين باش يتفاوضوا مع أي فريق باش يبعو العقد ديالو المهم ما يمشيش فابور. كل التقارير الفرنسية، كتقول أن العلاقة بين كيليان مبابي وباريس سان جيرمان خسرات، لدرجة أن اللاعب قال للفريق ديالو أنه مستعد يبقى كالس فالاحتياط الموسم الجاي، إذا ما ممشاش هذا الصيف لريال مدريد الإسباني، حيث رافض فكرة الانتقال لفريق آخر من غيرو، و PSG ما باغينش يخليو أحسن لاعب فالعالم يمشي فابور كيف ما قال القطري ناصر الخليفي مول النادي، داكشي علاش محتاجين يبيعو العقد ديالو قبل ما يسالي صيف 2024، أول أن اللاعب يجدد معهم على الأقل حتى صيف 2025، باش يدخلو فلوس من الانتقال ديالو، وبالمقابل فريال مدريد الإسباني باغي يجيب مبابي، ولكن فنفس الوقت ما بقاش باغي يدير صفقات غالية ومكلفة.
