تذاكر ديربي كاس العرش سالاو بعد ساعات قليلة على طرحهم للبيع

غيتلعب ماتش ديربي الدار البيضاء ديال دومي فينال كاس العرش بين الوداد والرجاء الرياضيين الاحد الجاي فتيران محمد الخامس، بكيشي فيرمي والتذاكر سالاو.
وبعدما تحطو تذاكر الديربي غير البارح الأربعاء على المنصة الالكترونية المخصصة لهم، دازت ساعات قليلة وصبحو اليوم الخميس مسالين، وتم الاعلان عن الكيشي فيرمي.
وكيعرف هذا الديربي بين الوداد والرجاء إقبال كبير من الجماهير، حيث الماتش مصيري لان كل فريق باغي يعتق الموسم بعدما خسرو بجوج لقبي البطولة الاحترافية وعصبة ابطال افريقيا.
وكذلك حتى الثمن ديال تذاكر الماتش، شجع الجماهير باش تشري ليتيكي حيث سعيد الناصيري رئيس الوداد ومحمد بودريقة رئيس الرجاء، اتفقو باش تكون الدخلة ابتداء من 30 درهم.
والاقبال هذه المرة على ماتش الديربي كبير بزاف، عكس اخر ديربي بين الفريقين اللي كان ضمن منافسات البطولة الاحترافية، وكان زاد فيه عزيز البدراوي الرئيس السابق للرجاء الاثمنة، الشي اللي تسبب فمقاطعة الجمهور للماتش.