الشرعي: المنتخب الأولمبي واجد لغانا اللي كنعرفوهم مزيان وغنحاولو نبداو ضدهم أحسن من الماتش ضد غينيا

أكد عصام الشرعي مدرب المنتخب المغربي الأولمبي، أن ليكيب ناسيونال واجدة لمواجهة غانا غدا الثلاثاء فتيران مولاي عبد الله بالرباط، برسم الدورة الثانية من كأس إفريقيا لأقل من 23 عام.
وتحدث عصام الشرعي مدرب المنتخب المغربي الأولمبي فالندوة الصحافية اللي كتسبق ماتش غانا، وقال: "تفرجنا فالماتش الماضي ديال منتخب غانا، وحنا عارفين قوتهم وعندهم فريق هجومي ولاعبين خطيرين كيديرو الفرق، كنعرفو نقاط ضعف الخصم والقوة ديالهم وحنا عندنا لاعبين مزيانين، وغنوجدو مزيان للماتش ضد غانا ونتمناو نربحو".
وزاد وضح الشرعي: "الماتش ضد غانا غيكون مفتوح غنشوفو كيفاش غيبداو الماتش، وحنا مهم لنا كيفاش نبداو الماتش حيث المواجهة اللي فاتت كان خاصنا وقت طويل باش نتحررو ونتمنى غذا يكون العكس".
مدرب المنتخب المغربي الاولمبي وجه ميساج لعشاق المنتخب المغربي وقالهم: "الجمهور عندو دور كبير باش يحمس اللاعبين ويقويهم، وكنتمنى يحضر كثر من الماتش الأولى باش يساند اللاعبين، والماتش الماضي ضد غينيا بدينا وحنا راجعين الوراء حيث مباراة بحال هذه كيكون فيها الضغط، وحتى الجمهور كيتسنى نيفو مزيان، وفالشوط الثاني اللاعبين بينو النيفو ديالهم وقلبنا النتجية".