الركراكي: الماتش ضد البرازيل صعيب ولكن غادي ندخلو نأكدو أن النتائج اللي حققنا فكأس العالم ماشي صدفة او زهر

أكد الناخب الوطني وليد الركراكي أن الماتش الودي ضد البرازيل غدا السبت فطنجة، غيكون صعيب حيث البرازيل منتخب كبير وعندهم لاعبين كبار، ولكن حتى المغاربة عندهم إمكانيات تخليهم يقدموا مباراة كبيرة.
وقال وليد الركراكي خلال الندوة الصحافية اللي ما كتسبق ماتش المنتخب الوطني المغربي ومنتخب البرازيل: "الماتش ضد البرازيل ما غيكونش ساهل، راه عندهم لاعبين مزيانين وكبار واخا نيمار غايب عليهم وكيلعبوا بفرق كبار، وهم أصحاب الرقم القياسي بالتتويج بكأس العالم خمس مرات وباغيين يرجعو الأمجاد ديالهم".
وكمل الركراكي وقال: "حنا معنا جمهورنا اللي مساندنا، وباغيين نديرو ماتش كبير باش نأكدو النتائج اللي حققنا فكأس العالم وأنها ماشي زهر وعندنا المؤهلات لذلك".