قبل ماتشات الباراج ديال الهواة.. مقربلة عاود ثاني فامزاب: رئيس إتحاد لولاد مستغل المنصب ديالو فالعصبة ومسيني مع مدرب موقف عامين

فضيحة جديدة تفجرات عاود ثاني فامزاب، هاد المرة ماشي فبن أحمد ولكن فثلاثاء لولاد لي راهم وصلو لماتشات الباراج من بعد ما سالاو الماتشات هما لولين، قبل ما تتوصل عصبة الشاوية دكالة بتظلمات مدينة للفساد لي كاين فهاد الفرقة.
وقال مصدر من داخل عصبة الشاوية دكالة ل"گود" أن المدرب ديال اتحاد الولاد لي ربح معهم بزاف ديال الماتشات هو موقف لمدة عامين وواخا هكاك رئيس الفريق فرضو باش يكون ضدا فكلشي.
وعلى حساب نفس المصدر فإن رئيس النادي هو عضو فعصبة الشاوية دكالة وبالتالي داير ضغط كبير وسط العصبة باش يخرق القانون لصالح الفرقة ديالو وهاد الشي لي جبد الصداع فهاد الفترة لي غيبداو فيها ماتشات الباراج.
هاد الشي تيذكر بفضيحة زاوية سيدي اسماعيل لي غمقو على القانون فمواجهة الاتحاد الرياضي لبن أحمد.