الكاتب العام فوزارة التربية الوطنية داير عصيان على بنموسى. اللي مستافدين معاه دارو اجتماع سري فالوزارة وخرجو ب: ما تعاملوش مع الديوان ديال لوزير

الكاتب العام لوزارة التربية الوطنية حالف حتى يبقى فبلاصتو. بالنسبة ليه وزير التربية الوطنية عندو غير عامين ويغيروه. هو باغي يبقى خالد فيها. متحكم فكلشي. هاد ليام داير ما يشبه الانقلاب على وزير التربية الوطنية شكيب بنموسى.
وفق ما علمته "كود" من معطيات فان الكاتب العام طلق الزبانية ديالو واللي مهلي فيهم خاصة شي واحد صغيور معاه فجمعية الاعمال الاجتماعية وواعدو بشي فيلا ديال الخدمة ودار اجتماعات باش كان بنموسى كيدور لحضور اجتماعات الاكاديميات. هاد الاجتماع وفق مصادر "كود" تخصص باش يواجهو بنموسى وديوانو ومستشاريه. وفق مصادر "كود" فتعطات الاوامر باش ما يتعاملوش مع اللي جاب بنموسى وما يعطيهمش لخبار.
تصورو المشاكل اللي فالتعليم وهم الكاتب العام هو يحافظ على مصالحو. راها فضيحة كبيرة وبزاف. اش من نموذج تنموي يقدر يكون فبلاد فيها امثال هادا