أخنوش رد على الانتقادات ديال التصدير: المغرب كيصدر فالمنتوجات الفلاحية 1,8 مليار متر مكعب ديال الماء فقط وكيستورد 20 مليار متر مكعب

بعدما تناسلات الانتقادات فالأسابيع والشهور اللي فاتت، واللي كتقول أن المغرب تيضيع الماء فإنتاج منتوجات فلاحية، وتيصدر هاد الماء معبأ داخل هاد المنتوجات اللي تتمشي على برا. وضع رئيس الحكومة عزيز أخنوش، فجلسة المساءلة الشهرية بمجلس النواب الاثنين، حدّ لهاد الانتقادات، وأكد أنه "بلا عملية التصدير، الفلاحين ماغيفلحوش الأراضي ديالهم، وما غانلقاوش منتوجات بحال ماطيشة فالسوق".
وقال أخنوش أن البنك الدولي، كشف خلال الملتقى الدولي للفلاحة بمكناس الأسبوع الماضي، أن المغرب "كيصدر من خلال المنتجات الفلاحية ديالو 1,8 مليار متر مكعب من الماء فقط، فحين المنتجات التي كيستوردها بحال السكر والزيت والقمح، فيها 20 مليار متر مكعب ديال الماء".
وشدد رئيس الحكومة، على أن تحليل خبراء البنك الدولي، كيبين أن المنتوجات الفلاحية المصدرة من بلادنا للخارج "فيها نسبة تثمين 8 د المرات أكثر من المواد اللي كنستوردوها". وأضاف أن القمح مثلا ماعندوش مردود مادي مهم للفلاح، والحكومة من جيهتها "مايمكنش تفرض على الفلاح يدير شي زراعة بزز منو، فظل ندرة المياه".