قصيدة زجلية: غصة لمرا

لمرا لمرا
آش هذ الحكرا
كثرت الهدرا
الربح من لمرا
ولخسارة من لمرا
عييتو ما تكذبو ع لمرا هاالكوطا
ها لغدر ملفوف ف الفوطا
سير الضيم هيجتي لجراف
وف قاع الواد طاحت لمرا
لمرا لمرا
غصتها ما تبرا
****
البارح ها لعلامات
ها المناصفة ف الشاشات
زغرتو يا لعيالات
تكشفو لوراق
فسوق النفاق
وطارت الهدرا المعمرة بالغبرا
8 مارس ما ادرى
ما اتصفح ما قرا
كتبو لو ف اللوح بمداد الحسرا
وصية مرصعة بالنقرا
الكرسي لكبير والضحكة الصفرا
والوردة الحمرا
وزيد من عندك هدية لمرا
حلي حزامك وحفي قدامك طلعي للنخلة
ليك الشوك، للراجل التمرا
ف عيشور نهديك سوارت لحكام
ترتاحي من القهرا
حني شعورك وزاوكي
ف مول القدرا
لمرا لمرا
عييتو ما تكذبو ع لمرا
الدين كرم الحميرا
والدستور نصفها بخمسة
من كل عشرا
اتشعشع الحمرا يسرق شعاها
ضي القمرا
واش لميمة تبات ف السمرا؟
آش هذ القهرا غلضتي الهدرا
هددتي لمرا ب لبرا
لمرا لمرا الرابح من لمرا
وخ خسرتو لهدرا
وعييتو ما تكذبو ع لمرا
هي تقرا وانت تقرا
كنتي وكانت لوزيرا
ول مصلاحت من تجرت لحصيرا؟
وتبقى غصة لكلام ف حكاية لمرا
ترويها لعكايز للصبيان يذرفو
دموع الحسرا
وبكفن ليام لمطرز بالحكرا
ترميها ف الحفرا
يصرخ زيزيف صرخة الدرا
طاحت الحجرا عل لمرا
وسمعنا ف الواد موال
آش هذ الحكرا كثرت الهدرا عييتو
ما تكذبو ع لمرا