«موال لبلاد»

خليوني نبكي ننسى الهم
يمكن يتفاحى هاذ الحال و الغم
على رجال
كانو فينا بحال لجبال
حقهم علينا شلا وشحال
حبهم فينا فايض شلال
وخا غابو
وخا رحلو ومشاو
مايتنساو....مايتمحاو...
من الخاطر و البال
رجال
ختارو حياة الحبس و الموت
ومارضاو بحكام السحوت
ختارو الحرية ليك وليا
باش لبلاد تتحرر تزهر وتولي بلاد
ختارو عيشة العز في الغيس
عل عيش الذل بين الذهب و اللويز
وكانو يقدرو
يماشيو الزمان في لغة لحكام
ويغنمو ما غنمو
لذياب و الشمايت لرذال
هاذ الرجال واش من رجال
كانو في الحق طوفان
كانو للمظلوم عولة وأمان
كانو غصة في حق البهتان
مايعرف بحقهم غير اللي
صادقهم ومنهم كان
صدحو بالصوت العالي
تحيا بلادي
صرصحو في العلالي
بصوت مدوي زلزال
هادمنا الغالي
قطروه منا قطرة قطرة
هاروحنا الطاهرة زهقوها منا
كيف بغيتو مليون مرة
وسيقو أرضنا تنبث رجال
وسيقو أرضنا تنبث رجال
راه كل غالي يرخص
في حق لوطان
إل كسات بلادي
خوذو هاذ الكسدة
شعلوها جمرة جمرة
ودفيو تراب لجداد
و إل عطشات
ها دمي الصافي مني ثاني
و سقيو غرسها ليذبال
و إل توهنات
خوذو عمري
خذو حياتي
وحييو.....حييو....هاذ لبلاد.