قصيدة .. زواق البهتان

بنادم يتسيف بزواق
وزواقو شلى لون
لون الحگرة والنفاق
والضحك بلمصالح مرهون
والله يرحم التحذاق
ولمحبة والنية ف الكون
الزمان قاسح وقراص
وقلة الشي وَبَا
واللي ما عندو... يرخاص
ويديروه ف ناعورة الكسابة
يلهث ع الخبز حواص
بين لخيام يتحابة
من والة يديرو رقاص
والمحنة عليه مكتابة
حيث الدنيا كمالة وتنصاص
وشحال هما عجابة
عايشين دوبل فاص
بين المغلوب والغلابة
يد تعطي التنخاص
ويد بلمجاملة وهابة
ولا منة بلا تنقاص
ولا محبة بلا صابة
وباش تكون ليك الكاينة
ويعطوك رسم الشان
أرا مدها باينة
وغاتسمع ف كل مكان
حروف لوفا صاينة
ملفوفة بزواق البهتان
وساعة ما يسمعوك جاينة
لمغطي ف الحضرة يبان
يروي اللي كاينة
واللي جابها اللسان
كأنو ف عصر هاينة
والغول وسيف دو اليزان
كأنو ف سوق لمعاينة
ولمخيرة لسي فلان
وهادشي علاش؟ على خُيْنا
وما جاب ف الميزان
وساعة ما تكون مكون
وما ليك ف الرجوع تقالة
ف الحركة تتخون
ويديروا لغاك بسالة
يسوطو فيك بلسان مدون
ومعاني وحروف نغّالة
ويگولو غير مجون
ولاش يتوالى
ما يحسوا بيك مرون
ما يسالوا ف الحالة
الفلس ف القلب تمكن
وسكن بألف نوالة
هكا زمانا تعنون
لا عمة لا عم لا خالة
لا فيمن تحسن الظن
وتگول العشرة مازالة