قصيدة حْمَامْ اُللِّيلْ

فِي يَوْمٍِ حزين مِنْ اَيَّامِ سَنَةَ تِسْعِين،كَانَ بَيْنَنَا صَدِيقٌ عَزِيزٌ،يَجْمَعُ بَيْنَ َالنَّبَاهَةِ وَالْمَعْرِفَةِ وَجَمَالِ الْمَظْهَرِ وَحُسْنِ الْخُلُق.فَجْأَةً وَبِدُونِ اسْتِأْذَانٍ، اخْتَفَى ولم يظهر له أثر.لِحَدِّ السَّاعَةِ لَا اَحَدٌ يَعْلَمُ وِجْهَتَهُ اَوْ مَصِيرَه بمن فيهم ُاُسْرَتَهُ.هَل اخْتِفَاءُهُ ْقَضَاءُُ وَقَدَر؟ٌ اَمْ هو فِعْلَةُ فَاعِلْ؟.الله أَعْلَم.اِنَّهُ سَعِيد الْمْرَابط ابنُ حِي قَاعْ الْحَافَة بِمَدينَةِ تِطْوان. وَاِلَيْهِ هَذِهِ الْمُحَاوَلَة البسيطة.
حْمَامْ اُللِّيلْ
مْنْ النَّظْرَة اللّْوْلَى عْرْفْتْكْ
مُحَالْ تْخْفَى عْلِيَّ حْرُوفْكْ
وَخَّا الظّْهَرْ احْنَى
وَخَّا المْشْيَة تْبْدْلْتْ
وَخَّا اللَّونْ ذْبَالْ وْالهَيْئَة تْغَيْرْتْ
وَخَّا الصُّوت خْفْتْ
وّخَّا الْبْسْمَة مْشَاتْ وْشْمْسْهَا بْهْتْت
مُسْتَحِيلْ تْخْفَى عْلِيَّ حْرُوفْك
يْمْكْنْ نْكُونْ كَنْحْلْم
يْمْكْنْ رْكْبْنِي لْهْبَال
يْمْكْنْ الْوْحْشْ غْلْبْ حْضُورْك
عَادْ الْبَارَحْ كُنْتِ مْعَانَا بْحَرْ وْمَا قْدُّوكْ سْوَاقِي
عَادْ كُنْتِ فِينَا شْجْرَة مْدْرْدْرَة وْغْصَانْهَا وْرَاقِي
عاَدْ كُنْتِ ظْلِيلَة مْنْ الشّْمْسْ النَّاسْ بِكْ تْلَاقِي
كُلْ شِي مْشَا ،كُلْ شِي تْبْدّْلْ، دَابَا آشْ بََاقِي
آشْ مْنْ طْرِيقْ خْذِيتِي ؟
آشْ مْنْ رِيحْ الدَّاتْكْ وْمَاجِيتِي ؟
وَاشْ كُنْتِ فْي عَقْلْكْ وْلاَّ حْمَاقِيتِي؟
خْوِيتِي الدَّارْ،هْجْرْتِ حْبِيبْك خْلِّيتِيهْ مْحْتَارْ ، ،
كْوِيتِي يْمَّاكْ
ظْلْمْتِيهَا
بْكَّيتِيهَا عليك لِيلْ وْنهَارْ
رَاكْ غَالْطْ
طُولْ عُمْرْكْ كَتْحْسْبْ بْوَحْدْكْ
وْاللِّي حْسْبْتِيهْ شْيّْطْتِيهْ
عْرَفْنَاكْ مْثَقّْفْ
عْرَفْنَاكْ قَارِي
يْخْلِي بَابَاهَا قْرَايَا الِّلي صَيْفْطَاتْكْ عَارِي
كُلْشِي كَانْ مْزْيَانْ
كُلْشِي كَانْ بَايْنْ
عْلاَشْ خْتَارْتِي الْهْرُوبْ؟
كِيفَاشْ؟
و حتى ْلاَيْنْ؟
مَاشِي سَاهْلْ تْخْوِي وْتْرُوحْ
مَاشِي سَاهْلْ فْي لَحْظَة تْنْسَحْبْ
وَاشْ نْسِيتِي الرّْيَاضْ؟
لْصْحَابْ وْالدّْرَارِي الْعْرَاضْ ؟
وَاشْ نسِيتِي الْقَهْوَة وَأَتَايْ بْالنّْعْنَاعْ؟
وَاشْ نْسِيتِي الْقْوَافِي ،الفن وْ الاِبْدَاعْ؟
وَاشْ نْسِيتِي؟
ْفْي النِّقَاشْ كُنْتِ وَاعْرْ
عْلَى لْسَانْكْ كُلْشِي كان سَاهْلْ
الْقَضِيَّة الْوَطَنِيََّة وْفِلِسْطِينْ
الثَّوْرَة البُلْشُفِيَّة وْلِينِينْ
فِينْ أَشْعَارْ اَبِي الْعَلَاءْ ؟
فِينْ غَزَلِيَّاتْ عُمَرْ ؟
فِينْ وُجُودِيَّاتْ سَارْتْ
و وفاءْ دِي بُوفْوَارْ؟
وَاشْ عْقْلْتِي؟
فْحَالْ البَارَحْ
كُلْشِي دَازْ فْحَالْ البَارَحْ
الدُّنْيَا غَدَّارَة
الْغْشِيمْ فِيهَا يْمْشِي خْسَارَة
صْقْصِينَا عْلِيكْ فْي كُلْ مْكَانْ شَافْتْكْ فِيهْ العِينْ
صْقْصِينَا عْلِيكْ كُلْ نْسْمَة رَاقْتْكْ فْي يُومْ حْنِينْ
صْقْصينَا نَاسْ الْغِيوَانْ مَارْسِيلْ وْالشَّيخْ اِمَامْ
صَقْصِينَا دْرْويِشْ سَعِيدْ المَغْرِبِي وْالَى الَامَامْ
طَالْ الزّْمَانْ ،ولا شي خْبَارْ،هَادِي ايَّامْ وْعْوَامْ
اَنَا مَانَاوِي نُسْكُتْ وْنْحْطْ لْقْلاَمْ
وَلاَ نَاوِي نْسَالِي وْنْوْقّْفْ لْكْلاَمْ
غِيرْ اِذَا بُعْدْكْ يْوْلِّي قْرِيبْ
وْقُرْبْكْ يْزِيدْ يْقْرّْبْ
وَخَّا الْمْشْيَة تْتْبْدّْلْ
وَخَّا يْحْنَى الظّْهْرْ
وْالزّْمَانْ يْفُوتْكْ
صُورْتْكْ دِيمَا فْي الْبَالْ
الْكَارُو فْالْيْدْ ْوْعَيْنْكْ فْالْهْلَالْ
يْمْكْنْ نْكُونْ كَنْحْلْمْ
يْمْكْنْ رْكْبْنِي لْهْبَال ْ
يْمْكْنْ الْوَحْشْ غْلْبْ حْضُورْكْ
الَامِين ْالاِدِرِيسِي